Hrangturzo bialtu MLA in thudik tarlanna ti chhuak; N. Vanlaiphai damdawiin ah Ayush Doctor post a awm lo: Muanpuia Punte

by News Editor

Tualchhung News

ZORAM TODAY| 13th August, 2024 (Tue): N. Vanlaiphai NGO co-ordination committee in kumin India Independence Day boycott an tum chungchangah Hrângturzo bialtu MLA leh Adviser to CM, Lalmuanpuia Punte chuan thudik tarlanna vawiin khan a ti chhuak.

Lalmuanpuia Punte chuan, N. Vanlaiphai Govt. High School Headmaster Lalnunzawmi chu June thla tawp lamah sawn chhuah a nih khan a aiawh tur ka zawng nghal a, N. Vanlaiphai-a Headmaster-a awm duh pawh ka hmu a, School Education Minister hnenah pawh ziakin ka hrilh nghal a ni, a ti.

Bialtu MLA chuan, “Minister chuan rampum huapa zirtirtu semrual (rationalization) tih mek a nih avangin School mal ringawt lo buaipui fal chu a buaithlak avangin nghah ve hret hrih a ngaih thu min hrilh a, tun atanga hun rei vak lovah N. Vanlaiphai Govt. High School Headmaster tha tak kan neih thuai a beiseiawm” tiin a tarlang.

N. Vanlaiphai damdawiina Ayush Doctor sawn chhuah chungchang hi a buaipui nasat thu sawiin, “N. Vanlaiphai NGO hruaitute pawh ka office-ah lo lengin kan sawiho a. Anni awm lai hian Ayush Department Joint Director pawh phone-in ka bia a, Ayush Joint Director chuan Central sorkar atangin inspection team an lo kal dawn avangin Ayush Doctor an post-a awm lo leh an post lova awmte siam rem a tul thu a sawi,” a ti.

Hrangturzo bialtu chuan, N. Vanlaiphai damdawiin chu Ayush Doctor post awm lohna a nih avang leh N. Vanlaiphai Ayush Doctor an sawnna chu Ayush Doctor post awmna tur ni si, Ayush Doctor awm lohna a nih avangin Central inspection team te lo kal laia chutiang an rawn hmuh chuan Mizoram State tan a that dawn loh avangin sawn ngei a tul avanga sawn an nih thu a sawi, a ti a.

Kei chuan Central inspection team ten inspection an neih zawh hunah min dah let sak tura ka ngenna pawh theihtawp chhuah a tum thu a sawi nghe nghe a ni. He kan inbiakna hi loudspeaker-ah dahin Ayush Department Joint Director thusawi chu an ngaithla ve a, an hrethiam viau niin ka hria, a ti a.

“A lawmawm hlea ka hriat lain hétiang boruakin min tlakbuak ta mai hi a pawi ka ti hle” tiin a thuchhuah ah a tarlang.

Nimin khan N. Vanlaiphai NGO co-ordination committee ṭhukhawm chuan hunrei tak an buaipui hnuah, N. Vanlaiphai Govt. H/S a Headmaster leh PHC a Ayush Doctor a thlaktu awmlova sorkarin a sawnchhuah pe kir tura an hmalaknaah hmasawnna hmuh tur an hriatloh avangin, N.Vanlaiphai a Independence Day, 2024 programme chu boycott an tum a ni.